2016年10月17日 星期一

大阪親子遊 DAY 2 環球影城

終於都寫好咗第二日嘅環球影城遊記啦!
要大家等咁耐真係唔好意思呢~

重溫一下
我哋今次係住喺大阪梅田區嘅希爾頓酒店
可以去返上篇睇返詳細資料

好!出發前先歎吓早餐先
32樓行政樓層除左到夜晚11點都有小食同飲品提供之外
朝早可以喺返呢層食早餐
地方雖然唔算太大 食物種類唔算多
都幾好食 夠食得飽㗎
有麵包有味噌湯
有芝士盤有沙律
有早餐穀物等等
望住大阪靚景食早餐 好有假期嘅感覺
食飽飽就出發咯
細佬仔唔知幾時學咗媽咪放副太陽眼鏡喺頭頂
仲好開心咁周圍叫人睇佢
總會覺得每次去出門小寶都會急速成長
媽咪要細心留意每個細節 成日都會有驚喜
 
由酒店坐15-20分鐘車就到咗環球影城
果日天氣好好 涼涼哋好舒服
據說我哋到達前幾日見天氣報話大阪打風
都曾經擔心未必黎到USJ玩
感恩一切順利!

重溫大阪環球影城 FB直播

哥哥一入黎見到個地球非常興奮
捉住媽咪影咗好多相
2013年頭同羲廷哥哥去過星加坡嘅環球影城
2016年一家四口黎USJ
想像一下 下次去洛杉磯嘅環球影城
家庭人數會唔會有所增加呢。。。。。(發白日夢中)
能夠陪住最愛嘅小寶去旅行
比起二人世界豐富好多好多
雖然會有疲倦激心嘅時候
但有得揀一定會把握佢哋成長嘅每一刻
到小寶成家後漫漫長月可以二人世界(爸爸嘅金句)
 
好耐無黎日本嘅媽咪 
今次可以帶埋兩個小寶黎返年青時代到過嘅地方
開心到跳起!
如果大家會係旺季去玩
可以考慮一下買唔買埋快證門票
縮短排隊時間 可以玩多幾樣野
因為每個ATTRACTION平均都要等成60-90分鐘㗎
如果帶住小朋友的話不妨計劃一下
CLICK返USJ嘅網頁有齊詳細票價
唔同嘅套票包唔同嘅遊戲或影院
一早買定預售門票 就可以留返多D時間玩lu
(果日見到排隊買飛都打哂蛇餅呀。。。)
CLICK HERE --環球EXPRESS門票
 
未入園氣氛已經超級好
見到好多人都悉心打扮成唔同嘅人物角色
有時真係分唔到係真。職員定真。遊客 哈哈!
呢幾個姐姐差乎行到邊都被不停集郵
細佬仔本身見到史力加有D驚
FIONA見狀同佢玩咗一陣就笑返
見到周圍氣氛咁好 我哋都忍唔住第一站就入咗鋪頭裝身
本身係好想買呢頂KITTY帽 但係戴住有D熱 最後無買。。。
 
哥哥一眼就揀咗MINION帽 不作他選
 
細佬見到又想跟 但其實佢係唔鍾意戴帽嘅 ^^
又試吓眼鏡 但眼鏡太大未"long"到 (笑)
自己戴唔到 又拎咗副比媽媽試
 
結果佢都係鍾意迷你兵
 
哥哥見到粉紅色SPIDER-MAN公仔
即刻好興奮咁叫媽咪睇
 
兩頂都好靚 但兩頂都有D熱。。。
 
爸爸揀咗每人一個迷你兵小袋仔 用黎裝萬聖節糖糖
 
買完野就出發去睇芝麻術的4D影玩
 

影院好似係每20定30分鐘一場 預啱時間就唔洗排好耐隊就入得
細佬同哥哥都睇得好開心 要注意入場會規定小寶要自己坐一個位
所以爸爸媽媽要留意啦
咁啱執咗件黃色衫比哥哥同細佬 
又咁啱呢日拎咗黎著
入到園就feel到 夾都無咁啱喎 可以扮小迷你兵
 
成個朝早都係天陰陰好好行
園區雖然多人但係都唔算太迫
下次等兩兄弟大個D先再黎玩SPIDER-MAN啦
亂入。。。迷你兵群
我唸行20步就會見到一群大小迷係兵 
黃色 周圍都好多黃色
下一站去咗哈里波特城
除咗真係好多遊客 成個城區好有電影感
係咪好有氣勢呢?
海報一樣
入夜應該都會好靚
 
臨入園前有讀者介紹話一定要試呢度嘅啤酒
於是我買咗連埋個杯嘅套裝 1100YEN
個味道係似雲呢拿cream加梳打
甜甜地 味道都OK
行咗一朝 係時候食lunch啦 媽咪我好肚餓呀~~~

午餐揀咗紐約城區嘅彩道日本料理餐廳
 
呢度選擇唔算多但好方便 
大人有人四,五個選擇 兒童餐有一款
 
等位時已經睇定 一坐低落單 野食都好快就到
味道可以 每個餐好似千幾二千YEN 感覺上平過香港嘅主題樂園
食完飯就行去啱哂小寶玩嘅芝麻街,史路比,HELLO KITTY園區
浴路見到芝麻街人物出黎帶小朋友唱歌同影相

呢個開車遊戲有分6歲以上小朋友 及3至5歲小朋友兩組
分開兩邊揸車
 
入場前要聽交通秩序
車速非常慢 爸爸媽媽可以放心
呢個熱氣球太多人排結果放棄無玩到
史路比世界都係其中一個熱點 要預多少少時間排隊
偶遇兩位ghostbusters 
日本嘅遊客真係好認真打扮入園玩㗎!
 
呢個係室內嘅遊樂場 啱哂家長抖一抖回回氣
裡面就似playroom一樣有好多野玩
小寶放電 家長可以坐喺傍邊睇住 乘機抖吓叉吓電
幸運地呢架ELMO船仔唔洗等好耐就坐到
上船前要承諾遵守三個守則先可以上船啊~
 
短短一個圈都幾好玩
後段有條小滑梯 衝落果下都有少少離心力 但絕對唔會濕身嘅放心~
 
淨係玩呢個大波波都有玩咗半個鐘
兩個小寶都唔願走
 
但波就係得果十個八個 要等有小朋友走就可以睇吓拎唔拎到黎玩
通常一組人會玩一個波
都有小朋友三,四個一齊玩 但一人一個波
或者你將波打咗去第二邊 就會成為人哋果波
所以媽咪都好努力睇住有無小朋友要離開
先可以爭取到有波波玩
仲要講比哥哥細佬知 要一齊分享 不能夠一人一個

跟住坐船仔呢一部份就真係會濕少少身
因為媽咪坐左手邊第一個 擋住哂
建議如果咁啱排到坐最邊 睇吓爸爸願唔願意頂咗佢
哈哈 濕少少啫 其實都無所謂
買咗個好可愛嘅八達通套 可以朝朝同細佬返學時用 唔洗成日拎銀包出黎

樂園有好多工作人員都有個南瓜袋
見到就可以同佢哋玩TRICK OR TREAT

 
影城愈晏愈多人 到我哋準備走嘅時候 
開始多人入場準備玩HALLOWEEN NIGHT

找亮點: SPIDER-MAN / HELLOKITTY萬聖節海報
兩樣都吸睛

 

其實除左MINIONS仲有好多好多好靚嘅COSPLAY
唔止淨係小朋友 連大人/一家大小都會夾一個共同嘅主題
氣氛真係好正
但湊住兩個影唔切咁多同大家分享添
如果大家下之黎玩 有時間可以花D心思打扮吓哎


臨走前再留影一張 第時大個再拎出黎對照

   
返返梅田區
去咗HILTON隔離嘅大阪第一酒店2樓嘅KATSURA
食SHABUSHABU晚餐
   
環境好舒服 可以坐低慢慢食慢慢休息一下

可以選擇唔同嘅湯底
服務員會幫你先放湯底料 再示範點樣煮最好食


哥哥一定好肚餓 食咗兩大碗烏冬

 
食完飯終於到媽咪期待嘅環節: SHOPPING時間
 
哥哥知道有得睇火車 
開心到帶住細佬跳舞

 
漫步日本街頭 10年前同大情人 10年後同小情人 同樣咁Sweet

 

行10分鐘就到咗咩都有得買嘅大型商店YODABASHI
Yodabashi有成8層咁高 
有電器/音響/影碟/電玩/雜貨/流行服飾/玩具/食肆
如果只得短短時間又要集中shop哂咁多野真係好適合
最最最緊要嘅係: 佢開到夜晚10點!!!!
若果喺百貨公司血拼到8點 可以即刻摩打腳行去YODABASHI行多兩個鐘
正喎~~~~~

4樓係玩具樓層 有大量大量足以俘虜媽媽嘅可愛玩具,用品
如麵包超人,新幹線,SANRIO系列
係咪好難忍手呢。。。
我已經忍住㗎啦 淨係買咗兩個咋。。。。

仲有大量火車,模型車,LEGO同其他益智學習工具
之前同大家分享過嘅FLASHPAD都有得賣呀


火車 火車 好多火車

 
 媽咪叫細佬揀兩架火車 一架比哥哥 一架比自己
 
揀咗一陣 終於揀到啦

同大小寶買完玩具
爸爸們就提出先帶小寶們返酒店
女士們可以留低繼續買
雖然爸爸好輕描淡寫咁講 但果一刻真心sweet啊
佢知我個心超想去shopping但又唔捨得放低兩兄弟
所以爸爸拍心口話搞得掂
話我得兩晚時間要好好把握
多謝爸爸!!

我當然把握機會shop到最後一分鐘
有相為証 行到拉閘

 滿載而歸
再講多次 多謝爸爸!

















1 則留言: