真.住家菜 素牛肉三鮮餃

從小到大都好鍾意食餃子

蒸餃煎餃鍋貼等等

每日食都唔會厭

細細個就最期待媽咪整餃子加上海湯麵比我哋食

人仔細細果時已經起碼一打起跳

從前放假有時間就會一家四口開壇整包整餃子

所以估計喜愛餃子嘅因子遺傳咗比羲廷

佢又係一樣無餃不歡

一出街食飯就一定首選湯麵餃子

但好多時發覺到喺街食嘅餃子味道比較濃

食完會口渴中足一日 飲極水都仲口渴

就知道裡面一定有"師傅"

所以為咗滿足我同羲廷呢兩個餃子控

每星期都會至少整兩餐餃子

鮮肉餃菜肉餃等等大家都已經好熟悉

今次想同大家分享一下素牛肉餃子

素牛肉餃子 

顧名思義就係以素牛肉代替肉類

之前喺GREEN COMMON入貨後

第一時間就唸起可以用黎整餃子

一向唔食牛嘅我 喺素食世界咩都食得

感覺幾爽 *0*

而呢隻素肉嘅質感同真牛肉非常似

係無咗陣騷味

"肉類不必源自動物 卻同樣含豐富營養"

 係BEYOND MEAT嘅理念 

大家可以去佢哋嘅網頁了解更多

準備材料: 

1. 餃子皮, 餡料: 小棠菜, 椰菜,紫洋蔥, 紅椒 ,甘荀, 粟米, 免治素牛肉

2. 素牛肉解凍

3. 其他蔬菜洗淨切粒

4. 餡料以鹽麴, 味琳, 麻油, 食用橄欖油略醃

   

素牛肉本身已經有少許調味 所以醃料可以輕手D^^

可以選擇做湯餃或煎餃

呢個係煎餃嘅造型

(手工勞作天份一向唔高 成日都想學習包靚D....*.*)

5. 煎餃: 下油起鑊,放餃子, 煎至底部淡黃色後加水加蓋中大火煮至乾水

6. 水乾後開蓋將餃子煎至金黃色就可上碟

因為大家太肚餓 一上碟就開始食

唔記得影相添......

搵返張舊相睇睇

  

舊相: 羲廷3歲

每逢星期六, 日總會揀一餐整餃子食

咁羲廷就可以幫手整

都係一個幾好嘅親子活動! 

關於BEYOND MEAT嘅影片: 按此

開餐找"素"系列 之 5星推介OVO CAFE

   前幾日天氣好好

有和暖嘅陽光 有微微涼風

著大褸會好似有d熱 

唔怕凍嘅我就咁hittech打底加針織top已經夠哂暖

呢日出動連續做咗好幾個新年訪問

路經上環嘅舊街道 有股淡淡嘅香港情懷

  

Top & Skirt : StunningSgirls

短靴: House of Avenues

呢一篇想同大家分享一間精緻又好味嘅素食餐廳

 名稱及地址: OVO CAFE

(圖片來源: OVO CAFE facebook)

呢度樓底特別高 兩面落地大玻璃

四周圍都充滿住綠色嘅佈置

環境好舒服

喺繁忙嘅中上環商廈區之中

就好似一個偷閒加油站咁

抖抖氣再衝刺!

同大家介紹吓午市/晚市嘅餐單

  

  午市有SET LUNCH $78-$118+ 

晚市SET DINNER $198 +  

亦都可以散叫 

有湯 或沙律 加主菜 

可另加咖啡/茶 , 加餐湯, 加冷壓果汁等等

 

左: 椰菜花湯  右: 甘荀忌廉湯

兩個湯都打得好細滑都夠味 但唔會咸

是日餐湯 日日都唔同㗎

 

呢個係素牛肉手抓包配沙律 

咖哩餡加脆卜卜嘅包 好惹味 

紅腰豆波菜忌廉長通粉

紅菜頭茄子意大利飯 

OVO CAFE話到比大家知

素食都可以好精彩 好多元化

唔係大家想像中嘅蒸菜炒菜同烚菜

得閒經過可以上黎試吓!

平日嘅午飯時間通常都FULL HOUSE

建議預先打去訂位好D

或是等過咗繁忙時間先幫襯都得

又或者可以去隔離嘅GREEN COMMON(素食超市)買吓野先

  

好鍾意個綠色購物藍 感覺好FRESH 

  

冰櫃裡面係素肉嘅選擇

有素漢堡扒, 魚手指, 雞槌, 雞肉, 瘦肉, 免治肉等等等等

呢幾枝沙律醬係我嘅至愛推介

Gluten-free / Dairy-free 

唔食蛋奶/有敏感症嘅朋友都啱

仲有蔬菜嘅王者: Kale 羽衣甘藍

用黎做沙律 蔬果汁都好正

羽衣甘藍Kale:

含豐富維生素、胡蘿蔔素、葉酸、鈣、和鉀等等

增加腸胃纖維

亦有助於抗炎 抗氧化等作用

亦已被証實有助降低膽固醇

還有於治療/ 預防癌症方面有積極嘅效果

大家有興趣可以再GOOGLE多D資料

健康果汁之選 口痕唔一家要飲氣水嘅

有藍薈汁 有椰青水 

仲有小朋友版 羲廷鍾意香蕉味

唔飲牛奶其實有好好好好多選擇㗎

米奶 豆奶 椰子奶 杏仁奶等等

呢款係我最常飲嘅藜麥奶

超級足料韓式醬 醃肉炒粉絲炒菜都得

仲可以整韓風年糕湯 部隊鍋等等

睇吓幾多料 仲要係MADE IN HONG KONG

支持本土出品!!

零食架: 有乾果片有餅糖朱古力 

 

呢一欄係RAW NUTS同唔同嘅飲品沖劑

仲有平過出面嘅奇異籽

仲有太多太多正野啦 

有時間的話上去慢慢逛慢慢尋寶啦^^

我會好好整理戰利品 

逐一同大家分享

呢幾日努力試味先!

真.住家菜 之 私房麻辣雞煲

在家千日好

由細細個開始就超鍾意食爹哋媽咪煮嘅住家飯

做咗一家之煮之後

當然要緊守岡位 

做好呢份工

將喺外面食到嘅美味東東

返屋企做個健康版本

皆大歡喜!

所以呢日老公話想外賣雞煲返黎打邊爐

我當然要立即出馬接柯打^^

材料: 

雞一隻 / 紫洋蔥/ 白蘿蔔/ 竹笙

蒜頭/ 薑/ 乾蔥 / 指天椒 / 大蔥 / 蔥段 / 花椒粒(optional)

醃料(雞件):

鹽麴 或 鹽 /  糖  / 花雕酒

調味料:

寧記麻辣醬 / 海鮮醬 / 花雕酒/ 麻油/ 花椒油或粉 

步驟1: 準備好各種材料 切段 薑, 蒜略拍

2. 雞件洗乾淨印乾水 加醃料醃至少30分鐘

黑底鍋夠哂穫氣 又夠大夠深 啱哂一陣打邊爐

3. 凍鑊落油 直至夠熱出白煙 加薑蔥蒜爆香

4. 炒至出味之後 就可以加雞件爆香

將兩面都煎到金黃色

煎緊一面嘅時候盡量唔好反黎反去

愛用媽咪鍋嘅原因 

用家們一定有同感

D鑊氣勁到呢 

5. 加白蘿蔔, 洋蔥圈 (一半份量 另一半後加) 

麻辣醬( 一隻大雞我落咗5湯匙)

海鮮醬 (3湯匙), 花椒粒/粉

海鮮醬同寧記麻辣醬可以喺citysuper搵到

我估其他大少少嘅超級市場都應該有

(海鮮醬背咗鏡 唔好意思... 影嘅時候唔為意添!)

6. 加花雕酒

以最細火加蓋燜約10分鐘

因為鐵鑄鍋非常鎖水 所以我無再加水

D雞汁同蔬菜嘅汁燜一陣已經出哂黎

如果用其他鍋 可視乎情況加水

7. 開蓋後再加其餘嘅洋蔥, 竹笙

 大火煮一陣收汁

 (咁就可以有兩個唔同爽脆度嘅洋蔥 有爽D有諗D 隨你鍾意

竹笙可以勁索汁 正呀!)

如果水份依然多的話就可以加生粉水收汁

8. 邊煮邊兜勻 見到雞件平均都掛到汁之後

臨尾加埋麻油

呢下落麻油都重要㗎 可以令d成個香咪更上一層樓

如想麻辣味個味再"麻"d  可以加多少少花椒油

9. 最後加埋芫茜, 蔥就完成啦!

我會再加蓋"cum"住 原煲上檯 焗多一陣

到食嘅時候一開蓋真係超級超級香呀!

今次加咗白蘿蔔 多咗種鮮甜味

層次豐富咗 好味過之前

雖然我唔食辣 

但見到大家食得津津有味就會好有成功感

連奶奶都邊食邊讚  

我知道今次係真. 好食! 

聖誕遊台灣 之 尾站台北

終於都寫到台灣遊記嘅完結篇

玩咗幾日甘甘哋

呢日宜休息休息

加上落雨又濕又凍

所以喺酒店歎個慢版早餐

浸吓溫泉 先慢慢準備出發

搭捷運去到101站

一條超級長行人天橋已經貫通咗四,五個大商場

可以無懼風雨慢慢行

方便到不得了!

食完中午飯行去誠品

坐吓睇吓書 羲廷羲穎都收穫豐富

  

兩兄弟都好鐘意呢度

 就咁坐喺地下都講咗成5, 6本書

估唔到細佬都可以幾專心同哥哥一齊聽故事

坐定定無周身郁

細佬瞓著覺 可以同哥哥二人世界

羲廷一歲時喺同一個位影過同一張相 ^^

粉紅色的鋼琴小生 

喺媽媽眼中 仲charm過爸爸當年追女仔個chok樣 (細細聲講...)

而細佬就一直都係哥哥嘅忠粉

難得有張一家四口合照 返黎睇返先見到兩兄弟古靈精怪 LOL

回程時細佬精力無限 

當哥哥好專心咁食緊野同睇緊戲嘅時候

羲穎三番四次咁搵哥哥玩

搞到哥哥忍唔住怒目而視

呢一幕都幾搞笑

跟住唯有自己玩爬牆 ^0^

台灣之旅結束

一有時間就會再同大家update返出門旅行嘅準備事項

密切留意啊!

另外好多朋友仔問台灣租車公司(可租Alphard)嘅資料

http://www.colago.com.tw/p2-tour.html

歡迎分享^^